*जिल्हाधिकारी अविश्यांत पंडा यांचेकडून स्ट्राँग रूम व मतमोजणी व्यवस्थेचा आढावा*
गडचिरोली, दि. २० : नगरपरिषद सार्वत्रिक निवडणुकांच्या अनुषंगाने २१ डिसेंबर रोजी होणाऱ्या मतमोजणीच्या पार्श्वभूमीवर जिल्हाधिकारी अविश्यांत पंडा यांनी आज कृषी महाविद्यालय, गडचिरोली येथे उभारण्यात आलेल्या मतमोजणी केंद्रासह मतदान यंत्रांच्या सुरक्षा कक्ष (स्ट्राँग रूम) व ईव्हीएम साठवणूक व्यवस्थेची पाहणी केली.
या पाहणीदरम्यान जिल्हाधिकाऱ्यांनी स्ट्राँग रूममधील प्रवेश-निर्गम व्यवस्था, सीसीटीव्ही निगराणी, सुरक्षारक्षकांची तैनाती, अग्निसुरक्षा उपाययोजना तसेच ईव्हीएम साठवणूक कक्षातील सुरक्षेच्या सर्व बाबींचा आढावा घेतला. मतमोजणी प्रक्रियेदरम्यान कोणतीही त्रुटी उद्भवू नये यासाठी आवश्यक खबरदारी घेण्याच्या तसेच निवडणूक आयोगाच्या मार्गदर्शक सूचनांचे काटेकोर पालन करण्याच्या सूचना त्यांनी संबंधित अधिकाऱ्यांना दिल्या.
यासोबतच कृषी महाविद्यालय परिसरातील बाह्य सुरक्षा व्यवस्था, वाहतूक नियंत्रण, प्रवेश नियंत्रण व मतमोजणीच्या दिवशी कायदा-सुव्यवस्था सुरळीत ठेवण्यासाठी करण्यात आलेल्या नियोजनाचीही त्यांनी तपासणी केली. मतमोजणी प्रक्रिया पारदर्शक, सुरक्षित आणि शांततेत पार पडावी यासाठी सर्व यंत्रणांनी समन्वयाने काम करण्याचे जिल्हाधिकाऱ्यांनी सांगितले.
या पाहणीवेळी गडचिरोली नगरपरिषद निवडणूक निर्णय अधिकारी श्रीमती स्मिता बेलपत्रे, मुख्याधिकारी सूर्यकांत पिदुरकर यांच्यासह पोलीस, महसूल व निवडणूक विभागातील अन्य संबंधित अधिकारी उपस्थित होते.
