*छत्रपती शिवाजी महाराज महाराजस्व समाधान शिबीर, अभियानातून महसूल सेवा थेट जनतेच्या दारी : तहसीलदार सागर कांबळे यांचे आवाहन*

गडचिरोली: प्रशासकीय कामे अधिक गतिमान व्हावीत आणि नागरिकांच्या तक्रारींचे निवारण एकाच ठिकाणी व्हावे, या उद्देशाने गडचिरोली तालुक्यात ‘छत्रपती शिवाजी महाराज महाराजस्व समाधान शिबीर अभियान (टप्पा १)’ राबविण्यात येत आहे. या अभियानाच्या नियोजनासाठी तहसीलदार सागर कांबळे यांनी दिनांक 27.02.26 रोजी पोर्ला मंडळ कार्यालयात विशेष सभेचे आयोजन केले होते. सर्व शासकीय यंत्रणा उपस्थित होते. यावेळी त्यांनी तालुक्यातील जास्तीत जास्त नागरिकांनी या शिबिरांचा लाभ घेण्याचे आवाहन केले.

या नियोजित मोहिमेची अंमलबजावणी प्रभावीपणे व्हावी, यासाठी नायब तहसीलदार चंदू प्रधान यांनी मंडळ अधिकारी आणि तलाठी यांची बैठक घेऊन सर्व महसूल मंडळांमध्ये पूर्वतयारी सभांचे आयोजन केले आहे. प्रशासकीय यंत्रणा आता पूर्णतः सज्ज असून, नागरिकांना विविध दाखले आणि दाखल्यांमधील त्रुटी दूर करण्यासाठी शासकीय कार्यालयांचे उंबरठे झिजवावे लागणार नाहीत.

*मिळणाऱ्या प्रमुख सेवा:*
या शिबिरांच्या माध्यमातून खालील महत्त्वाच्या सेवा जागेवरच पुरवल्या जाणार आहेत:
* प्रलंबित फेरफार आणि ७/१२ मधील चुकांची दुरुस्ती.
* उत्पन्न, रहिवासी, जातीचे आणि नॉन-क्रीमीलेअर प्रमाणपत्र वाटप.
* डिजिटल स्वाक्षरीचे ७/१२ आणि ८-अ उताऱ्यांचे वाटप.
* पी.एम. किसान नोंदणी आणि रेशन कार्ड संदर्भातील कामे.
* अकृषक (NA) परवानगी, ‘सनद’ प्रक्रिया आणि ॲग्रीस्टॅक योजना.
* विद्यार्थ्यांसाठी विविध शैक्षणिक दाखले.

*शिबिरांचे वेळापत्रक खालीलप्रमाणे:*

दिनांक ०७/०३/२०२६
शिवाजी कनिष्ठ महाविद्यालय, पोर्ला
दिनांक १४/०३/२०२६
मंडळ कार्यालय, बाम्हणी
दिनांक १०/०४/२०२६
जि.प. प्राथ. शाळा, पोटेगाव
दिनांक १७/०४/२०२६
साईनाथ विद्यालय, येवली
दिनांक ०८/०५/२०२६
नगर परिषद, गडचिरोली
“पारदर्शक आणि लोकाभिमुख महसूल प्रशासन” हे या अभियानाचे मुख्य सूत्र आहे. नागरिकांनी आपल्या आवश्यक कागदपत्रांसह संबंधित तारखेला उपस्थित राहून या सुवर्णसंधीचा लाभ घ्यावा, असे आवाहन तहसील कार्यालय, गडचिरोली यांच्या वतीने करण्यात आले आहे.